فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

السلام عليكم يا دكتور
أنا عمرى 24 سنة.. مكتوب كتابى لقريبى، وحاليا مختلفين فى الطموح. أنا طموحة وعاوزة أتغير وأتطور، ولما أتطور أحب نغير وضعنا، زى مثلا نسافر نستقر فى العاصمة، حتى إذا عاوز يبدأ من الصفر حأقف معاه. بس هو رفض وقال لى إنتى طموحك عالى، وأنا طموحك، وشغلك يكون فى مدينتنا بس، حتى لو فى كورس محتاج سفر أو كدا لأ، أنا مش عارفه أتعامل معاه إزاى حاليا، وكمان حابه إنى أسافر وأشتغل ومش عاوزه أتنازل. بس حقيقى مش عارفه أعمل إيه.

صديقتى العزيزة..
أشكرك لرسالتك الهامة..
من حقك جدا تكونى طموحة بلا حدود.. ومن حق خطيبك أو زوجك أن تختلف حدود طموحه عنك.. لكن مش من حق حد منكم إنه يفرض رؤيته أو حدود طموحه على الآخر..
ماينفعش إنتى تفرضى عليه تغيير هو مش عاوزه أو مش مستعد ليه.. وماينفعش هو برضه يقيدك ويشل حركتك ويقولك: «أنا طموحك»..
طب نعمل إيه؟
نتناقش.. نقول كل اللى جوانا.. نحاول نوصل لحل يرضينا إحنا الاتنين.. ولو ماحصلش.. يبقى كل الخيارات مفتوحة.. وإلا هاتظلموا نفسكم إنتم الاتنين..
وبمناسبة الكلام ده.. أدعوكى وأدعو كل المقبلين والمقبلات على الارتباط.. اسألوا بعض يا جماعة.. اتناقشوا.. اعرفوا بتحبوا إيه ومش بتحبوا إيه.. اتأكدوا عاوزين إيه من بعض.. مشتركين فى إيه ومختلفين فى إيه.. إيه يناسبكم فى بعض وإيه مايناسبكمش.. خليكوا صرحاء وأمناء مع أنفسكم.. اتناقشوا بدون مساومة.. اتفقوا بدون تنازل.. بلاش تتجاهلوا علامات الإنذار المبكرة..
لو هاتكملوا كملوا عن رضا واقتناع تام.. ولو ده مش موجود.. يبقى مافيش نصيب.. علشان ماينتهيش بيكم الأمر بين جدران صماء خالية من أى حب وأى مودة.. وأى حياة..
كل التوفيق إن شاء الله..