ــ على فكرة ما ينفعش تقول الكلام ده كده وخلاص. الكلام ده غلط جدا. اسأل حد متخصص. اسأل شيخ.
ــ دى مجموعة تساؤلات منطقية بسيطة ويسعدنى رأيك فيها.
ــ لأ أنا مش متخصص. بس كلامك أكيد غلط، وأنا شايف انك لازم تجيب شيخ، ومتأكد إن حجته هتثبت خطأ كلامك.
ــ حجة على إيه؟
ــ مش عارف لأنى مش متخصص، ومعنديش فكرة رد الشيخ ممكن يكون إيه.
ــ طب ما تسأل أنت شيخ وتكون رأى وتقوله.
ــ لو سألت أكيد مش هافهم لأنى مش متخصص. اللى أنا متأكد منه إن كلامك غلط، رغم إنى مفكرتش فيه. ومتأكد كمان إن كلام الشيخ اللى أنا معرفوش هيفحمك ويقيم الحجة على كلامك. وعلى فكرة تساؤلاتك مش مشروعة أصلا لإن العلماء أجمعوا على المسائل دى.
ــ وانت تعرف يعنى إيه إجماع العلماء والا محتاج اسأل شيخ؟
ــ لأ دى واضحة. المسائل اللى كل العلماء متفقين فيها دى إجماع، والمسائل اللى غالبيتهم أقروها تبقى بموافقة جمهور العلماء.
ــ طب هم مين العلماء؟ مش احنا علشان نحدد إذا كان مجموعة من الناس أجمعوا على حاجة أو حتى أغلبيتهم وافق عليها، المفروض نعرف هم مين بالضبط؟ عددهم كام وأسماءهم إيه؟ وبعدين نحصر مواقفهم علشان نحدد اذا كانوا أجمعوا والا جمهورهم اتفق.
ــ لأ دول كتير جدا. دول علماء المسلمين جميع وخاصة علماء المذاهب الأربعة.
ــ اللى عايشين يعنى؟
ــ لأ كلهم. من أول ما بدأ العلم.
ــ بس تقسيمة المذاهب بدأت تقريبا فى القرن السادس الهجرى.
ــ قبل كده يبقى العلماء كلهم. مش بالضرورة المختصين بالمذاهب.
ــ عندك قائمة بالعلماء كلهم علشان نمسك المسائل واحدة واحدة ونشوف اذا كان فيه إجماع مطلق أو اتفاق من الجمهور؟ ما هو مش معقول نقول إجماع من غير ما نبقى عارفين مين اللى أجمعوا!
ــ انا مش فاهم انت معقدها ليه؟ المسائل اللى بتطرحها مفيهاش كلام أصلا. أنت بتضرب فى «المعلوم من الدين بالضرورة».
ــ هو إيه المعلوم من الدين بالضرورة؟ فيه قائمة محددة بالمعلوم ده لنكف عن النقاش فيه؟
ــ دى الحاجات الواجبة تحليلا وتحريما. يعنى مثلا الصلاة والصوم والـ..
ــ لأ انا مش عاوز أمثلة. انا عاوز القائمة الكاملة.
ــ ما هو المعلوم ده بيتغير حسب الزمان والمكان. مش ثابت على طول.
ــ أنا كنت فاكر مادام «معلوم» يبقى ثابت. طب إيه هى قائمة المعلوم من الدين بالضرورة فى زماننا هذا وفى المكان اللى احنا فيه؟
ــ مش بالبساطة دى. المعلوم بيختلف زمانا ومكانا وأيضا من شخص للتانى. المعلوم عندى غير عندك. لو فيه شخص فى بيئة مسلمة، مسئولياته والمعلوم له يختلف عن شخص فى بيئة غير مسلمة.
ــ طب لو قلت لك إيه هى قائمة المعلوم من الدين بالضرورة النهاردة وفى هذا المكان وبالنسبة لواحد زى حالاتى كده مع افتراض انى فى بيئة مسلمة وعارف كل حاجة ومسئول عن كل حاجة. إيه هى القايمة ومين بيحطها أو يحدثها أو يغيرها؟
ــ ما انا قلت لك القايمة مش محددة، وأكيد العلماء يقدروا يقولولك. أنا مش عاوزك تبلبل أفكارك والأهم من كده انك ما تعملش فتنة بين الناس بيها. الأحسن زى ما قلت لك تسأل شيخ.
ــ مين يعنى؟
ــ اجتهد ودور وإن شاء الله لكل مجتهد نصيب. وأنا على يقين إن كلامك اللى معنديش رد عليه علشان أنا مش مؤهل، ممكن ببساطة شديدة جدا أى عالم دين يفحمك فيه ويقيم عليك الحجة برد أنا معرفوش وما اقدرش حتى اسأل شيخ عنه لإنى مش هافهمه. خطورة تساؤلاتك دى انها بتضرب فى الثوابت.
ــ الثوابت! إيه هى الثوابت؟ عندك قائمة؟
ــ اسأل شيخ!