علق الإعلامي عمرو أديب، على هزيمة النادي الأهلي بخماسية ثقيلة أمام فريق صن داونز الجنوب إفريقي في ذهاب الدور الثمانية بدوري الأبطال، متناولًا ردود أفعال جمهور الأهلي الغير متقبل للنتيجة، بقوله: «قللوا الحكاية دي شوية، انزلوا لتحت دي كورة».
وأضاف خلال تقديمه برنامج «الحكاية»، المذاع عبر فضائية «إم بي سي مصر»، مساء أمس السبت، «ده نادي كورة يا جماعة، انزلوا شوية، أنتم بتربوا أجيال لا تقبل الهزيمة، ومفيش حاجة كده، وبعدين الجمال في العودة، إن الفرقة ترجع».
واستطرد: «إنما إيه الإحساس إن مصر انكسرت يا رجالة، مين ده اللي يكسر مصر، ده إحنا 7 آلاف سنة محدش كسرنا، تتكسر في ماتش كورة؟ بشويش كده، واهدوا كده وربنا كريم».
وعقب: «إيه حكاية الأهلي؟ ده نادي زيه زي أي نادي، زي ريال مدريد وبرشلونة ويوفنتوس، معرفش إيه الشيء غير العادي، اتغلبتوا خلاص، هارد لك، ويبدو إن لعنة الأهلي مبتشتغلش في جنوب إفريقيا، عندهم هناك جاميكا مختلف، هزروا وخليكم لطاف كده».
وخسر النادي الأهلي، أمس السبت، أمام مضيفه صن داونز الجنوب إفريقي 5-0 في ذهاب دور الثمانية بدوري الأبطال الإفريقي.