مدام حريقة! - حسام السكرى - بوابة الشروق
الخميس 14 نوفمبر 2019 8:35 ص القاهرة القاهرة 24°

احدث مقالات الكاتب

شارك برأيك

ما توقعك لنتائج منتخب مصر في كأس الأمم الأفريقية تحت 23 سنة؟

مدام حريقة!

نشر فى : الأحد 19 أبريل 2015 - 9:20 ص | آخر تحديث : الأحد 19 أبريل 2015 - 9:20 ص

مجموعة من مسئولى وزارة التعليم تقف داخل مكتبة مدرسية فى سترات داكنة ونظارات سوداء، تتوسطهم سيدة تغطى شعرها بإيشارب أزرق.

ليل داخلى فى النفوس، ونهار خارجى. شباك المكتبة مفتوح ويطل على حوش المدرسة. يلقى التلاميذ نظرة متطلعة عبر الشباك من حين لآخر.

ــ فرزتوا المكتبة كلها يا مدام قبل ما نولع؟ هى دى بس الكتب اللى عايزة الحرق؟

ــ يا فتوح بيه دول اكوام اكوام. هنفرز إيه؟ احنا شدينا كل كتاب فيه كلمة إسلام أو إسلامية. الكتاب اللى شكله متطشرف، أو مدى على تطشرف كده نشده على طول. حاكم الكتاب بيبان من عنوانه.

ــ يطلعوا كام كتاب؟

ــ يعنى.. بتاع سبعين..

ــ يعملوا حريقة حلوة علشان الصور؟

ــ يعملوا يا فتوح بيه

ــ ومعانا علم مصر؟

ــ دحروج عدى عالفجالة جاب شوية أعلام

ــ يكفونا كلنا؟ أنا هاخد علمين لوحدى

ــ ههه دا انت الكل فى الكل. تلات أعلام كمان.. هههه.. علم فى كل إيد، والعلم التالت.. العلم التالت…

ــ ...

ــ ...

ــ العلم التالت فين يا أستاذة فاتن؟.. كملى!

ــ ما اقصدش يا فتوح بيه. يوه.. أهى كلمة وطلعت

ــ مين اللى هيصور؟

ــ تامر بن اختشى زى كل مرة. جاب الموبايل السانسون أبو كامارا وهنطلع له مكافأة

ــ لو هينزل الصور عالنت كمان مفيش مشكلة.. ميتين جنيه زى المرة اللى فاتت

ــ ميتشين وخمسين.. ده هينزلهم عالمواكع

ــ طب ياللا.. خلى شعبان يطلع الكتب فى الحوش ويغرقهم جاز

ــ حالا

ــ متأكدة ان مفيهمش كتب لحد من بتوع التليفزيون؟ دول واصلين وزعلهم وحش

ــ ما تقلقش يا فتوح بيه. أنا بصيت كويس

ــ مفيش حاجة للشيخ خالد؟

ــ بن الوليد؟ لأ.. ما لقيتلوش كتب خالص

ــ الشيخ خالد الجندى يا أستاذة

ــ لا هو ولا خالد صالح. ولا حتى خالد احمد خالد بتاع زمان. انا شلت أى كتاب فيه «خالد» احتياطى.

ــ وعمرو؟؟

ــ بن العاص؟

ــ لأ... بن خالد.. عمرو خالد يا أستاذة فاتن!!

ــ يوه.. ماهو خالد برضه.. الكتاب اللى فيه خالد بنحرقه على طول. بس مش هتصدق لقينا كتب لمين كمان. البنا ذات نفسه.

ــ يانهار اسود. حسن البنا؟

ــ لأ رجب.. رجب البنا.. بيقولوا حسن مات وشبع موت.

ــ عفارم عليكو. جمعى وفد الوزارة، وخلى شعبان يكوم الكتب فى الحوش، وطلعوا التلامذة.. هيفرحوا قوى. وصى تامر يبدأ يصور بعد شعبان ما يخرج من الكادر.. خليه يوسطن الصور.. ما يعملش زى صور حفلة الوزير وياخدلك مليون صورة وانا لأ

ــ خالتشو بقى.. هههه... اسم الله عليه بيحبنى اكتر من مامتشه. ما تخافش. انا نبهت عليه من ساعتها وقلت له فتوح بيه يسنتر الصور كلها

ــ توكلنا على الله

ــ تولع انت واللا اولع انا؟

ــ خلى شعبان يولع.. مش عايز ريحة الجاز تطلع فى البدلة..

ــ قطيعة.. واللا ريحة الكتب اللى مالية المكتبة بعيد عنك. دانا هتشومى كلها اتشملت تراب!

ــ توكلنا على الله، ارفعوا أعلام مصر

التعليقات