البوست:
اشعر بانتعاش غريب عندما يطلع الصباح وتغرد العصافير.
التعليقات:
ــ حضرتك تقصد البلابل أم العصافير؟ لو كنت قلت البلابل كان بقى أفضل بكتير.
ــ كيف تجروء على أن تشعر والمسلمون يموتون فى ميانمار؟
ــ اتفق معك يا سيدى. الحياة بدون شريك تكون جرداء كالصحراء.
ــ الحقيقة تتضح والكون يضوى بعبير الحياة.
ــ هل تقصد الصباح أم الفجر. الفجر يطلع قبل الصباح!
ــ هل تعرف أن النمل الأحمر يرحل من منزلك عندما تقرأ المعوذتين عشرة آلاف مرة؟
ــ هل تعرف أن تناول كوب من الماء البارد صباحا ينشط وظائف الكبد.
ــ كثير من الناس يعتقد أن النقود مصنوعة من الورق، والحقيقة أنها مصنوعة من القطن.
ــ حدرتك كتبت الألف فى كلمة «أشعر» كما لو كانت همسة وصل، والأصح أن تكتب بهمسة كتع.
ــ إنه الانقلاب، هذا زمن السيسى.
ــ هو الخالق الذى آثرت ألا تحمده وتشكره على نعمه، لم لا تقول سبحان الله والحمد لله.
ــ لولا السيسى لساد ظلام الإخوان الحالك، حرموا الغناء ومنعوا تغريد الطيور.
ــ ههههه حلاوتك.
ــ ممكن على الخاص؟
ــ وداعا لسرقة السيارات، مع أصغر وأسهل وأذكى جهاز تتبع وتحكم فى العالم.
ــ سعيد انى لقيتك. هو حضرتك بتشتغل فين دلوقتى. انا متابع حضرتك من زمان، وحافظ كل أغانيك يا أستاذ حسن.
ــ أشعر بفتح التاء واللا بضمها.. ممكن تفسير لو سمحت؟
ــ دانت رومانسى طحن.
ــ ل** عن** ومر*** ك**** ناف****
ــ مافيش فايدة.
ــ والله انت رايق.
ــ عايز اتعرف على بنت مصرية تكون بتحب تتكلم سكس فون، أو بنت تكون دلوعة بتحب الدلع والمياصة والكلام بينا فى سرية تامة.
ــ بوست جميل. أنا كتبت زيه قبل كده. لأ انا كتبته هو.. الحقيقة انت أخدت البوست بتاعى.
ــ البوست ده ساخر وربنا قال لا يسخر قوم من قوم.
ــ اسمح لى انا مختلف مع حضرتك لكن ده ما يمنعش انى احترمك.
ــ انا آسف على التعليق اللى فوق وممكن امسحه لو كان فيه إساءة.
ــ هتعملى بلوك.. اعملى بلوك.. انتو كده يا مدعى الليبرالية.
ــ طب ممكن نعرف رأيك فى اللى حصل فى رابعة؟
ــ حضرتك فاكرنى؟ انا محمد.. فاكرنى.. محمد احمد؟
ــ ممكن اعرف تقصد إيه؟
ــ أرجو متابعة صفحتى
ــ انحنى لهذا الكلام الرائع.
ــ مرسى راجع
ــ مرسى مش راجع
ــ انا مندهش من الكلام ده وكنت منتظر ان حضرتك تكتب حاجة تانية خالص انا كنت بافكر فيها. مابتكتبهاش ليه؟ مش ده كان يبقى احسن، واللا حضرتك ما يهمكش الناس ومش فارقين معاك. أنا آسفة انى صريحة معاك ولو عايز تعمل بلوك ممكن تعمل بلوك.
ــ اول مرة احس ان حد ممكن يعبر عنى بالبساطة والعمق ده.
ــ الإنسان فى العصر ده فعلا بيشعر ان المدنية الحديثة بتعقيداتها ابتدت تقضى على قدرة الإنسان على الإحساس بالجمال. يا ترى هيكون لسه فيه صباح فى مدن تئن تحت غزو ناطحات السحاب ومفيش صباح بيطلع فيها علشان سحب التلوث البيئى أو حتى السحابة السودا بتاعة قش الرز. وخد بالك انى قلت المدنية، مش الحضارة. فرق شاسع بين الاتنين.
ــ طب مانت رومانسى اهو. امال عمل تكتب العقل والنقل.. وماسك لنا العصاية وانت مديها نحنحة.
ــ على فكرة مش كل الناس ممكن تفهم الحس الساخر بتاعك. الجمهور بتاعنا عايز كلام مباشر.
ــ حضرتك فعلا انسان جميل وتستاهل.
ــ شفت انا طلع عندى حق ازاى!
ــ واضح ان حضرتك متأثر فى كتاباتك بالفترة اللى قضيتها فى انجلترا.
ــ شابو.. بوست سياسى ساخر وجميل.
ــ ياللا يا جماعة نكز ولايكات لحسن فيه حد عامل ريبورتات على صفحتى.