قال الإعلامي عمرو أديب، إنه ضد مجانية التعليم الجامعي بمصر، معقبًا: «أنا شخصيًا ضد التعليم الجامعي يبقى مجاني، حضرتك اتعلم لحد الثانوية العامة مجانًا، بعد كده إنزل اشتغلك سنة سنتين لم فلوس أو خد قرض طالب وتتعلم تعليم جيد فعلًا».
وأضاف خلال تقديمه لبرنامج «الحكاية»، المذاع عبر فضائية «Mbc مصر»، مساء أمس السبت، «مجانية التعليم الجامعي مسألة خاصة بمصر، وتتميز منذ سنوات طويلة لا أعرف عددها بتعليم جامعي مجاني»، لافتًا إلى أن الطلبة بالولايات المتحدة وبريطانيا يحصلون على قروض من أجل الالتحاق بالجامعات.
وتابع: «بما إن التعليم مجاني بيبقى في معايير تانية خالص معاك فلوس خش كلية طب أو خش هندسة أو إعلام خش اللي يعجبك، وفي النهاية بنطلع لسوق العمل منشتغلش، أنا دفعتي معرفش مين فيها اشتغل في الإعلام، الناس بتطلع بعد ما بتجري على كلية وجامعة ودوشة وبتاع في النهاية لا يعملون في المجال».
وأوضح أن مصر الدولة الوحيدة المتميزة بعدم عمل أصحاب الشهادات في مجال دراستهم بعد التخرج، مستطردًا: «عند ذهابك إلى الولايات المتحدة أي مواطن درس الهندسة بيبقى مهندس، قلما تلاقيه فاتح قهوة، مع احترامي للي فاتح قهاوي، بس الناس داخلة تخش تتعلم حاجة عاوزة تشتغلها».