نشرت وزارة الأوقاف، منشورا جديدا عبر صفحاتها على مواقع التواصل الاجتماعي ضمن مبادرة صحح مفاهيمك بعنوان "الغش مش لحظة نجاة".
وبدأت وزارة الأوقاف منشورها: "الغش مش لحظة نجاة..ده بوابة كبيرة بتدخّل منها الهزيمة على نفسك، والثقة اللي بتخسرها قدّام كل مراية تبص فيها".
وتابعت: "اللي بيغش مش عاجز عن الفهم ولا فاقد للقدرة، لكنه محتاج يعيد اكتشاف معنى التعلّم، وليه بيدخل التجربة دي من الأساس".
وأضافت: "في ناس فاكرة إن التعليم مجرد قيود ثقيلة بتخـنق الطموح، ومسار مفروض بيقتل الشغف، وإن الغش هو طوق النجاة من عذاب ملوش معنى".
وبينت: "بس الحقيقة؟ التعليم مش عـذاب، والامتحان مش خصومة، واللي بيمنع الغش مش قاسي، ده بيحاول ينقذك من إنك تخرج للحياة من غير سلاح".
وأشارت: "الغش بيهدم قيمتك من الداخل قبل ما ينجّحك، ويزرع جواك فكرة خطيرة إن النجاح ممكن يتحقق بالخداع، وبيخليك تشوف التعب ظلم، والنظام قهر، والمعلم خصم، الغش مش تيسير ولا شفقة، الغش سقوط أخلاقي".
وتابعت: "سقوط في حق نفسك، وأهلك، وزمايلك، ووطنك اللي بيحاول ينهض بيك. واللي بيكسب حاجة بالغش، سواء مركز أو وظيفة أو أي منفعة، فده بيخلي شبهة الحرمانية تظل ملازمة لكل ما يكسبه مدى حياته، حتى لو باين عليه النجاح من الخارج".
واستشهدت بآيات قرأنية: "وربنا سبحانه وتعالى قال: {وَلَا تَبْخَسُوا النَّاسَ أَشْيَاءَهُمْ} [الأعراف: ٨٥]، والغش نوع من البخس، بخس للحق، وللعدل، وللجهد الحقيقي ولو كنت فاكر إنك مش قد التعليم".
ودعت الطلاب قائلة: "اسمعني كويس، أنت مش ضعيف، بس محتاج تفهم إن العلم نور بيحررك من الجهل، وبيفهمك نفسك والدنيا وربك، ابدأ من النهاردة: وواجه امتحانك بصدق وسيب بصمة شريفة، حتى لو درجتك قليلة وماتخليش الغش يسرق منك بركة العلم ولا احترامك لنفسك".
ودعت الوزارة للطلاب: "اللهم طهّر قلوبنا من الخيانة، ونفوسنا من الغش، وارزقنا فهمًا يُرضيك ونجاحًا من فضلك".