ــ على فكرة، كلامك امبارح مش كويس وممكن يسبب ضرر للقيم بتاعتنا.
ــ كلام إيه؟ انا كنت باتكلم عن المجموعة الشمسية.
ــ أيوه، وموقفك بالنسبة لكوكب عطارد مش كويس.
ــ انا جبت سيرة عطارد؟
ــ دى المشكلة. انت ما قلتش أى حاجة عنه!
ــ يا عم هى عافية؟ عطارد إيه اللى لازم اتكلم عليه؟
ــ بص. مادام ذكرت المجموعة الشمسية يبقى لازم تذكر عطارد. ده الطبيعى وده اللى كل واحد بيعمله.
ــ ما هو أنا ما جبتش سيرة بلوتو.
ــ لأ. دى مش زى دى. بلوتو حمادة وعطارد حمادة تانى خالص!
ــ مش فاهم.
ــ لازم دايما نفتكر عطارد ونفكر نفسنا ونفكر الناس انه معمول من الجبنة الرومى.
ــ انت بتهرج!
ــ انت بتنكر ان عطارد معمول من الجبنة الرومى؟!
ــ ده كلام فارغ
ــ عندك دليل انه مش معمول من الجبنة الرومى؟
ــ عندك انت دليل انه معمول من الجبنة الرومى؟
ــ جدى قال لى وانا صغير.
ــ ده مش دليل.
ــ لأ دليل. والمرواغة بتاعتك معناها انك ضال، وماشى ورا هواك، وعاجز عن الرد بكلام مقنع.
ــ لو كان جدك بيتكلم جد، ممكن المعارف بتاعته تكون محدودة فى عصره.. لكن فى الأغلب كان بيتسلى معاك!
ــ شوف.. لو مش عاجبك ان عطارد جبنة رومى، قول لى هو معمول من إيه.
ــ معرفش. ما رحتش هناك. مش فارق معايا.
ــ شفت؟!.. جاهل. وفرحان بجهلك، وبتحاول تنال من جدى وعلمه. الراجل كان عالم كبير غصب عنك وعن أمثالك.
ــ الله يرحمه كان طيب وعلى قده. وأكيد كان بيسرح بيك وواخدك على قد عقلك.
ــ كذب.. كان عالم كبير
ــ ماشى.. بس برضه عطارد مش معمول من الجبنة الرومى
ــ طب اثبت انه مش معمول من الجبنة الرومى.
ــ طب اثبت انت انه معمول من الجبنة الرومى.
ــ جدى قالى كده، وده دليل كفاية لحد ما تجيب انت دليل تانى.
ــ على إيه؟
ــ ان عطارد معمول من أى حاجة تعجبك. أو انه مش معمول من الجبنة الرومى.
ــ...
ــ شفت انت فشلت ازاى!
ــ عطارد...
ــ اشمعنى؟
ــ معمول من البسطرمة
ــ يا راجل بلاش سفه. فيه كوكب يتعمل من البسطرمة؟
ــ يعنى البسطرمة حرام على، والجبنة حلال على جدك؟!
ــ با راجل بالعقل شوية. لو جدى كان قال بسطرمة؟! تبقى بسطرمة. لإنه مصدر ثقة. بس هو ما قالش. مفيش مصدر ثقة بيقول ان عطارد معمول من البسطرمة.
ــ عم سيد
ــ عم سيد مين؟
ــ عم سيد البقال هو اللى قالى لى.
ــ عم سيد بتاعك بيفهم اكتر من جدى؟
ــ عم سيد ثقة وخبرته مهمة. بيبيع بسطرمة وبيفهم فيها كويس.. جدك مش متخصص وعمره ما باع جبنة رومى!
ــ...
ــ...
ــ أنا جعت. تيجى نعمل سندوتشين عطارد؟!
ــ أى عطارد فيهم؟
ــ اللى نلاقيه فى المطبخ.