علق الفنان أحمد السقا، على الجدل الذي أثير بشأن رسالته المصورة الذي وجهها تضامنًا مع لاعب ليفربول محمد صلاح بسبب أزمته الأخيرة مع النادي.
وقال خلال مداخلة هاتفية مع برنامج «الحكاية» عبر شاشة «mbc مصر»، مساء السبت: «كنبت بلبس علشان أروح فرح بنت محمدهنيدي تصفحت التليفون لقيت صورة لمحمد صلاح وكان بيبكي فصِعب عليّ جدا.. أخدتني الجلالة وطلعت عز الدين أيبك اللي جوايا، وعملت فيديو لدعم أخويا محمد صلاح اللي مشرفنا».
وأضاف: «كنت بحمِّس محمد صلاح واخترت أوجِّه رسالة باللغة الإنجليزية علشان وسائل الإعلام هناك بتكتب عننا.. واستخدمت أعلى مصطلح علشان أوصلهم إن اللي بيتكلم على أعلى قدر من الدراية والعلم وإن اللي بتعملوه مع صلاح هيخسر ليفربول جماهير كتيرة في العالم العربي».
وتابع: «ربما خانتني بعض الألفاظ لكني لم أخطأ في لفظ كوتش فهو مصطلح نستخدمه في مصر لكن يبدو أنه في الغرب يفهم بمعنى تاني وكان حديثي بحسن نية وربنا مطلع على القلوب».
واستكمل: «الفيديو اللي قلته باللغة الإنجليزية فضل 55 دقيقة والفيديو اللي كان باللغة العربية كان 6 ساعات.. ومش أنا اللي حذفت الفيديو وأنا مش بعمل حاجة غلط ولا بجري في خناقة».
وعبر السقا عن شعوره بالإحباط من سلوك المصريين والعرب، وقال: «أول ما الفيديو العربي اتعرض كانت ردود الفعل إيجابية باستثناء بعض الناس اللي دخلت السياسة في الدين وفي غزة».
وأضاف: «بعدها نزلت الفيديو الإنجليزي وأنا مش بخاطب مجلس إدارة ليفربول لكني قلت لعل وعسى تصل رسالة من مواطن عربي بيدعم ابن بلده لإن إحنا عددنا كبير وقلة قليلة فقط هي اللي ممكن تكون واخدة من صلاح».
وتحدث عن سبب استخدام لفظ ميجا ستار في الفيديو، قائلا: «استخدمته علشان في الغرب عندهم التصنيفات دي وبيستخدموها لكن أني مش عندي جنون عظمة».
ولفت إلى أنه فوجئ بآلاف التعليقات التي حملت إهانة له وأسرته، وقال: «مبقتش عارف أعمل محضر في مين ولا مين.. وأنا لا يمكن أكون سبب في أذى حد».
واستكمل مستغربا: «هل الشعب اللي كان بيطبطب على أي حد مضايق اتقسم بهذا الشكل.. حتى اللي بيدعمني في التعليقات كان بيتعرض لقدر كبير من الشتائم .. إحنا المفروض أحن من كده».
وتابع: «لو حد شاف شكلي هيندم اللي علي قاله.. إيه المشكلة إني أطلع أدعم ابن بلدي».
وقال السقا: «أنا مشفق على اللي قاعد وراء الشاشة هو أنا هجيبه منين.. أنا مستعد أعتزل تمثيل وأقطع كارنيه النقابة وأبقى مواطن عادي وأقول بقى اللي يعرف يكلمني يوريني نفسه بس أنا متربي ومقدرش أقول كده».
وأكد السقا أنه مصدوم من ردود الفعل، وقال: «مش مصدق إن الناس اللي شالتني وعملتني هي نفسها اللي بتعمل فيا كده.. أنا عملت تسجيل خروج من أكونتاتي ومستعد أعمل تسجيل خروج من حياتي كلها بسبب الضغط اللي أنا فيه».
وشدد السقا، على أن الدولة بحاجة لوعي جمعي وإعادة تعديل سلوك، داعيًّا المسئولين لاتخاذ اللازم إزاء هذا الأمر.
وكان السقا وجه رسالة لإدارة فريق ليفربول الإنجليزي، من خلال فيديو عبر حسابه الرسمي على «إنستجرام»، طالبهم خلاله بمراجعة ما قدمه صلاح مع الفريق الإنجليزي خلال الـ8 سنوات الماضية، وإنه لديه استعداد للتدخل وحل الأزمة بين الطرفين.
وفي وقت لاحق، نفى السقا، حذفه الفيديو وقال: «أنا لم أحذف الفيديو الخاص بالكابتن محمد صلاح، الموجه لنادى ليفربول، ولكن فوجئت بحذفه من على حسابي على الإنستجرام والفيسبوك زيي زيكم».
وأضاف: «واضح إنى دخلت فى منطقة مش بتاعتى، ومع ذلك كل التوفيق للنجوم العرب في الدوري الإنجليزى وأخص بالذكر كابتن محمد صلاح الكلمة اللي زعلتهم».