فيه فرق كبير بين الرجولة والذكورة..
الذكورة هى النوع.. الرجولة هى الفكر..
الذكورة هى الجنس.. الرجولة هى السلوك..
الذكورة هى البيولوجيا.. الرجولة هى الموقف.

معروف عن الرجل الشرقى أنه رجل شهم، وشجاع، وغيور.. يحمى أهله وبيته بعُمره.
رجل طيب وحَسَن النية.. يُفضِّل مَن حوله على نفسه، ويهتم بتلبية احتياجات زوجته وأولاده قبل احتياجاته هو شخصيا.. وممكن ــ حرفيا ــ ماياكُلش ومايشربش.. وينام على الأرض.. فى مقابل أن يشعروا هم بالأمان.
رجل رومانسى وحالِم للغاية.. ممكن يعمل أى حاجة علشان اللى بيحبها.. ولو كانت التضحية بنفسه، أو بأغلى ما يملك.
لكن وبكل أسف.. تجمعت عدة عوامل فى العقود الأخيرة.. اختطفت من هذا الرجل رُجولته، وتركت له ــ فقط ــ ذُكورته.. أحرقت شهامته وشجاعته وجُرأته، وأبقت على صوته وصورته وعضلاته.. حوَلته من رجل حقيقى مُبادر وحازم ومسئول، إلى رجل مُزيف مُتباهٍ بخشونته وقسوته وافترائه.
هذا الكتاب ليس عن «الرجل الشرقى»، الذى سمعنا عنه وعرفناه قديما.. بل هو عن «الذَكَر الشرقى» الذى تسلَل إلينا أخيرا، وعاش بيننا بديلا عنه.. تلك النسخة الباهتة فى ألوانها، الخافتة فى نورها، والمُشوَهة فى ملامحها.
فى رأيى أن الذكورية الشرقية ــ بهذا الشكل وذلك السلوك ــ مرض.. ومرض صعب جدا.. لأنها تُصيب نفس صاحبها ببعض الأعراض.. وتُفسد روحه ببعض المضاعفات.
تُصيب نفسه بالنرجسية والأنانية والغرور.. وتُفسد روحه بالسادية والسيكوباثية وتَحَجُّر المشاعر..
تُصيب نفسه بالتسلط والفوقية والوصاية.. وتُفسد روحه بالكِبر والغطرسة والعنجهية..
تُصيب نفسه بالظلم والتجبر والعدوان.. وتُفسد روحه بالنكوص والاتكالية والتنطع.
الذكورية الشرقية مش بس مرض.. بل هى متلازمة مرَضية كاملة.
مشكلة هذا المرض (أو المتلازمة) الأولى إنه مش بس بيؤثر على صاحبه ودائرته الصغيرة.. لأ.. ده بيؤثر على دواير أكبر وأوسع بكتير.. بيؤثر على عائلات وجماعات ومجتمعات كاملة.
مشكلته التانية إنه مش مرض حاد ظهرت أعراضه فجأة.. ونقدر نعالجها بسرعة، بدواء مُسكن أو حتى بعملية جراحية.. لأ.. هو مرض مُزمن.. عمره عقود من الزمن.. ومحتاج مجهود شديد ووقت طويل لعلاجه.
ومشكلته الثالثة هو إنه مرض خبيث يُشبه السرطان.. مُتوغِل ومستفحل فى عقول كثير من الرجال والنساء على السواء.. مُخترق لطبقات الوعى الجمعى إلى أعماقها.. مُستشرٍ فى شوارع وحوارى وأزقة الشخصية العربية حتى النخاع.
الكتاب ده هيحاول يقرب.. ويستعرض.. ويحلل.. ويفهم.. ويقدم رؤى علمية وعملية لتغيير وعلاج هذه المتلازمة المرضية المستعصية.. بشكل مُفصل ومُبسط فى نفس الوقت.
الكتاب مُقسم إلى أربعة أبواب.. اخترت أن أعرضها بطريقة الطبيب الباحث الذى يسعى إلى وصف المرض، ثم تشخيصه، ثم علاجه.
الباب الأول.. بيوصف أعراض الذكورية الشرقية.. وبعض أنواعها.. هنتكلم عن الراجل «ابن أمه»، والراجل «جوز أمه ــ نفسيا».. هنشوف الراجل «ابن مراته».. والراجل «أبو مراته».. كل واحد منهم موصوف ومشروح فى فصل مستقل وبأمثلة من الواقع.. ووضعت بين كل نوع والتانى فصلا ذا موضوع مختلف ــ فى نفس السياق طبعا ــ علشان تعرف تاخد نفَسَك، وتهضم اللى قريته، وتستوعبه، قبل ما تنقل على النوع اللى بعده.
الباب الثانى.. هيورينا ــ وبتفصيل كبير ــ أسباب المرض، وأصوله.. هنشوف إيه فى طريقة التربية ممكن يطلع ذَكَر شرقى.. إيه فى العلاقة بالأم والأب.. إيه نوعية الرسائل المجتمعية اللى بتوصل له وتشجعه وتنميه وتغذيه وتكبره.. وإزاى بيتم اجتزاء واختزال الدين، واستخدامه فى غير موضعه وغير مقصده.. من أجل صُنع ذَكَر شرقى.
الباب الثالث.. هيكشف لنا إيه مضاعفات الذكورية الشرقية.. إيه مخاطرها؟ ممكن توصل بينا لغاية فين؟ ممكن تتمادى إلى أى حد؟ هنشوف نوعية وجود الذَكَر الشرقى فى بيته، هنتكلم عن الجنس فى حياة الذَكَر الشرقى.. عن التحرش والتنمر والخيانة.. عن استخدام العنف والقهر والعقاب مع أى أنثى تقول لهذا الذَكَر «لأ».. وعن الطلاق أو الانفصال بأشكال مُهينة ومُجحفة وغير مفهومة أحيانا.
أما الباب الرابع والأخير، فيقدم فهما أوسع وأعمق للجانب الآخر من الحكاية.. هنشوف الأمور من زاوية الذكر الشرقى نفسه، وهنستكشف الجانب المُظلم والبُعد الخفى من تركيبته النفسية.. هنعرف احتياجاته القديمة، اللى عدم تلبيتها فى وقتها بهدله وبهدل اللى حواليه معاه.. هنفهم مخاوفه اللى ما اتعلمش يداريها غير بالعنف أو بالانسحاب.. وهنكتشف حقوقه النفسية (الحقيقية) اللى حرمانه منها منذ طفولته، وخلال تربيته، وحتى كبر سِنه، أدى لمصائب وكوارث يدفع ثمنها الجميع.
ومن هنا.. هتكون نقطة البداية نحو العلاج.. ونقطة الانطلاق نحو التغير.
والحقيقة إن هذا التغير.. لو ما بدأش يحصل من الآن.. فى الوقت اللى الوعى فيه عمَال يزيد.. والأجيال المتتالية عمَالة تراجع كل اللى وصلها على مدى عُقود.. والبنات والسيدات والرجال (الحقيقيون) عمالين يفندوا ويفلترُوا وينقحوا كل علاقاتهم واختياراتهم وقراراتهم.. فتأكدوا..
إن هذا الديناصور البشرى الضخم..
لو لم يدرك.. ويفهم.. ويتطور..
ويقوم بتفكيك.. وإعادة تركيب نفسه من جديد..
فلن يكون له أى مصير، سوى الاندثار والفناء..
ولن يكون له أى تاريخ، سوى ماضٍ أسود مظلم..
ولن يكون له أى مكان، سوى رُكن بعيد مُختفٍ، فى أحد متاحف العالم، تحته لافتة صغيرة مكتوب عليها بخط غير واضح:
«ذَكَر شرقى مُنقرض».
```
أصعب ما فى الكتاب ده عليا كان حاجتين:
الحاجة الأولى هى اكتشاف إن أحد شُركاء (وداعمى) صناعة الذَكَر الشرقى، اللى بيقهر الأنثى، ويهينها، ويتعالى عليها، هو المرأة الشرقية نفسها.. واللى بتكون أحيانا أكثر ذكورية من الذَكَر الشرقى ذاته..
والحاجة التانية.. هى إنى استعرضت مع كل كلمة كنت باكتبها، حياتى أنا الشخصية.. وراجعت بكل صدق وإخلاص وعُمق، تاريخى مع ذكوريتى الشرقية.. بدايتها.. تفاصيلها.. آثارها.. ثم رحلة تغيرها.
ماهو ماينفعش أطلب من الناس يشوفوا جوَاهم، من غير ما أشوف جوَايا معاهم.. ماينفعش أنظَر وأحلل من بعيد، من غير ما أغرس إيدى ورجلى فى الأرض وسط اللى قرروا يعملوا ده بشجاعة.. وماينفعش أدَعى إنى باحاول أعمل توعية نفسية.. قبل ما أكون سلَطت ضوء التوعية المؤلم، داخل غيابات ودهاليز نفسى أنا شخصيا.

```
أخيرا.. وليس آخرا.
أرجوكم.. وانتوا بتقرءوا..
مش عاوزكم تحكموا على هذا الرجل/ الذَكَر الشرقى..
مش عاوزكم تسخروا منه.. ولا تُحقروا من شأنه.. زى ما بيحصل فى سياقات كتير..
علميا وطبيا ونفسيا وإنسانيا.. ماينفعش تحكُم أو تسخر أو تُحقِر من شأن أى شخص.. سليم أو مريض.. عدو أو حبيب.. صغير أو كبير.
النماذج المذكورة فى الكتاب نماذج مريضة وغير سوية، ولا يمكن تعميمها على الإطلاق، وبرضه لا يمكن السخرية منها أو التندر عليها، لأن ده مؤذى جدا.
وأنا مش كاتب الكتاب ده علشان كده..
بالعكس..
إحنا مش هنتعالى عليه.. لأنه من جواه ــ زيه زينا ــ غلبان جدا.
ومش هنرفضه ونستأصله من وسطنا.. لأنه ناتج وخارج من نفس الظروف الحياتية اللى بنمُر بيها يوميا..
ومش هنفقد فيه الأمل.. لأنه خريج نفس مدرسة التربية اللى اتربينا عليها كلنا.
إحنا ــ زى ما اتعلمنا فى رحلتنا مع بعض ــ هنقبله.. حتى لو مش موافقين على اللى بيعمله.. فالقبول لا يعنى الموافقة.. ولا يعنى الاستسلام.. بل هو المرحلة الأولى والأهم فى أى تغيير..
وهنتعاطف معاه.. لأنه جزء لا يتجزأ من نسيجنا وتركيبتنا المجتمعية..
وهنحاول نحط نفسنا مكانه.. نحس بيه.. ونفهمه.. ونحاول نساعده.
وأرجو.. إن هو كمان يحاول يساعد نفسه.

موافقين؟
طيب.
يالا تعالوا نبدأ رحلتنا..
بجدعنة..
وشجاعة..
وطيبة..
وبمنتهى الأمل.

محمد طه
من مقدمة كتاب «ذكر شرقى منقرض»
دار الشروق ــ يناير 2012