العلبة فيها فيل! - حسام السكرى - بوابة الشروق
الأحد 11 أبريل 2021 8:20 م القاهرة القاهرة 24°

احدث مقالات الكاتب

شارك برأيك

هل تؤيد قرار تدريس اللغة الهيروغليفية بالمدارس؟

العلبة فيها فيل!

نشر فى : الأحد 19 يوليه 2015 - 9:00 ص | آخر تحديث : الأحد 19 يوليه 2015 - 9:00 ص

ــ العلبة دى فيها إيه؟
ــ مفيهاش حاجة.. فاضية
ــ غلط.. العلبة دى فيها فيل!
ــ يا عم فيها فيل إزاى بس؟! سلامة الشوف.. دى فاضية!
ــ عرفت إزاى إنها فاضية؟
ــ انت مش شايف انها فاضية؟! أهيه.. قلبتها والفيل ما وقعش منها.. فاااااااضية!!
ــ انت عارف ان الإبصار ده حاسة من الحواس. صح؟
ــ طبعا حاسة من الحواس..
ــ ومعترف معايا إن احنا إدراكنا محدود وبيتأثر بحاجات كتيرة
ــ مظبوط
ــ يعنى ممكن زاوية النظر أو عوامل الإضاءة تغير لك المرئيات
ــ أكيد
ــ خلاص.. العلبة فيها فيل
ــ مش ممكن. طب سيب اللى شايفينه بعنينا. يا أخى ربنا ادانا عقل. وبالعقل كده مفيش فيل من أى حجم ممكن يدخل فى العلبة دى
ــ انت قلت العقل؟
ــ ايوه العقل اللى ربنا اداهولنا وأمرنا نستخدمه
ــ تفتكر عقلك ممكن يحيط بكل شىء؟
ــ أكيد لأ
ــ يعنى بتعترف ان عقلك قاصر
ــ أكيد عقلى قاصر. لكن فى النهاية هو ده اللى ربنا اداهولى وكلفنى افكر بيه
ــ لكن مش ممكن يحيط بكل حاجة. ربنا بس هو اللى ممكن يحيط بكل حاجة. صح؟
ــ صح طبعا ما فيهاش كلام
ــ يقدر عقلك يحيط باللى خلق عقلك؟
ــ أكيد لأ. عقلنا محدود مهما كان
ــ تفتكر ربنا يعجز عن خلق أى شىء خارج القوانين اللى عقلك يعرفها
ــ استغفر الله. ربنا قادر على كل شىء
ــ يبقى العلبة دى فيها فيل.
ــ يا سيدى بالراحة شوية. هيبقى فيها فيل ازاى؟
ــ انت مش اعترفت ان حواسك قاصرة عن إدراك كل شىء
ــ أيوه صحيح.. لكن يعنى بالعقل كده..
ــ تانى هتقول لى العقل؟ الكبر والغرور والوقوع فى شرك العقل البشرى القاصر هى بداية الطريق للهلاك
ــ بس يعنى.. أصل انا مش شايف.. أو يعنى اقصد مش معقول..
ــ الإيمان مفيش فيه مش شايف، أو مش معقول.. الإيمان بتلغى فيه العقل والحواس
ــ بس مفيش حاجة فى الإيمان اسمها «العلبة دى فيها فيل».. مش منطقى
ــ انت دارس؟ انت عالم؟ أنا بس اللى بادى شهادات العلم وما اديتكش شهادة. هل تعتقد انك ممكن تفهم النص أو تقدر تفسره؟
ــ أعتقد ان أى شخص عاقل ومتعلم يقدر يفهم..
ــ هى دى المشكلة.. كل واحد فاكر إنه بيفهم من غير ما يرجع لى. كل واحد بيجترئ على النصوص والمقدسات. دى بداية سكة جنهم. غواية العقل. خداع الحواس. ادعاء الفهم، والاجتراء فى غياب أدوات المعرفة
ــ...
ــ بص تانى.. بص كويس. العلبة دى فيها إيه؟
ــ شوف.. أنا فى البداية ما كنتش متأكد.. وبصراحة الحكاية مافيهاش صح وخطأ بالضرورة
ــ ترددك معناه إن إيمانك ناقصو قلبك ملوث بالهوى، وعقيدتك مش خالصة
ــ انا.. لأ.. بالعكس تماما
ــ ازاى؟
ــ فى الأول ما كنتش شايف قوى، بس الصراحة دلوقتى متأكد ان مفيش فيل.. مفيش فيل واحد بس. ده قطيع من الأفيال
ــ حلت البركة.. تعالى على جنب.. اللى بعده!

التعليقات