فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، للإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.

راسلونا على: http://m.me/mohamedtaha.net

●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.

سؤالي غريب ..أنا بنت، وفيه رجل من معارفي متعب نفسيا جدا يبكي و عنده احتياج عاطفي شديد (هو متزوج و عنده بنتين) .. أخشي أن أعامله بحنان يحتاجه فيتعلق بي .. ماذا أفعل؟
شكرا لحضرتك..

- أختى الكريمة..
خلينى أقولك سر..
أكتر حاجة ممكن تفسد أى علاقة عاطفية من ناحية الأنثى.. هى ان الست تعامل الراجل على انه ابنها.. تنتابها ناحيته مشاعر الأمومة.. تفتح له أبواب الحنان والعطاء والسماح بشكل هو أشبه للنزيف منه للوصال..
عارفة ده بيعمل إيه؟
بيستدعى منه الاستغلال استدعاء.. بيحرك فيه شياطين الانس والجن.. بيستحضر من داخله كل ألاعيب الأطفال القديمة..
واسألى كل من جربت واستُغلت وابتُزت عاطفياً..
يا ستى..
رجل من معارفك.. متعب نفسياً.. يروح يتعالج.. مش شغلتك تعالجيه.. ولا دورك ولا شغلتك ولا هاتعرفي..
عنده احتياج عاطفى شديد.. دى مشكلته يا ستى.. يحاول يحلها هو.. يسعى ويسأل ويجتهد.. انتى مش أمه.. انتى مش منقذ.. انتى مش ربنا..
متزوج وعنده بنتين.. يعنى مراته موجودة.. وعنده احتياج عاطفى.. فيه حاجة اسمها علاج زواجى.. وفيه حاجة اسمها مسئولية شخصية وعائلية عن نفسه وعن بيته.. مافيش خالص أى مسئولية عليكى ناحيته..
أخشى أن أعامله بحنان.. تعامليه بحنان ليه حضرتك؟ عامليه معاملة طيبة.. فقط.. انتى مش مفروض تكونى مصدر حنان ليه من الأصل.. والدته ممكن تكون مصدر حنان.. زوجته ممكن تكون مصدر حنان.. ولو دول مش نافعين.. يبقى -تانى وتالت- يروح يتعالج.. ومن فضلك.. مش انتى اللى تدوريله على العلاج.. ولا انتى اللى تسعي معاه للدكاترة.. ولا تتابعى حالته.. أرجوكى..
تانى..
انتى مش أم حد (غير أولادك).. ولا منقذ حد (غير نفسك).. ومش مصدر حنان لحد (غير مستحقيه من أهلك).
رفعت الأقلام وجفت الصحف..