كشف الفنان وائل علاء، أسباب ابتعاده عن الساحة الفنية طوال السنوات القليلة الماضية، لافتا إلى تعرضه للابتزاز على يد محامي وأحد المنتجين، واتهمهما باستخدام بياناته في تزوير إيصال ومساومته.
وقال في برنامج صباح البلد، الذي تقدمه الإعلامية نهال سمير على قناة صدى البلد، الخميس: "أنا موجود في المسرح لكن مش لا تليفزيون ولا سينما؛ بسبب إني كنت بتعرض للابتزاز".
وأضاف: "كان فيه منتج عمل تزوير، وكان فيه حاجات كانت معمولة أنا معرفش أي حاجة عنها، والحمدلله ربنا أكرمني واثبت إن أنا تمام وحاليًا باخد حقي قضائيًا، وهو منتج عمل عملين واختفى".
وقال: "اللي عمل عليا اللعبة دي بالاشتراك مع المنتج، هو محامي وخسارة يطلعله كارنيه محاماه لأنه معندهوش ضمير، وعمل اللعبة دي عليا وعلى ممثلة تانية، وهما استغلوا إن معاهم البطايق بتاعتنا عشان يعملوا بيها عقود وعملوا بيها حاجات تانية عشان يبتزونا بعد كده".
واستطرد: "أنا أول ما اتنصب عليا عملت محضر بالواقعة والقانون جابلي حقي واتحكم عليه، لكنه هربان حاليًا، وكان عشان يساومني جابلي محامي وزوروا إيصال عشان يبقى في قضية منهم ضد قضية مني ويبدأ يساومني، ومن كرم ربنا إني عرفت بده من البداية والمحامي بتاعي عمل حاجة اسمها محاكمة استئنافية".
واختتم حديثه، وقال: "وقت ما اتنصب عليا، قولت حسبي الله ونعم الوكيل لكن بعدها سمعت خبر وفاته والراجل ده توفى لكن في ناس تانية هتتحاسب والمحاميين اللي زوروا واستخدموا بطاقتي مش هسيبهم".