ــ أظن واضح بالنسبة لك ان الوضع تفاقم والساحة محتاجة تغيير. معظم البدائل فشلت علشان نماذج بشرية ما تقدرش تقدم حل.
ــ يعنى اللى بيتكلموا عن السبى والنهب وقطع الروس هم اللى معاهم الحل؟!
ــ دول نماذج شاذة وغير معبرة عن التيار. تيارنا أكبر من كده. لو صدقت بينا وساعدت فى تطبيقه مش هتصدق نفسك.. رخاء.. سعادة.. صلاح.. حاجة كده تفتح النفس وتشرح القلب وتزغزغ الوجدان وتنعنش الأفئدة..
ــ نطبق إيه؟ انت مش واخد بالك كل اللى رفعوا شعاراتكم عملوا إيه؟!
ــ السيئ منهم استثناء يثبت القاعدة ولا ينفيها.
ــ ولما الإخوان خربوا البلد كان قاعدة واللا استثناء؟
ــ التيار أكبر من الإخوان. وبعدين الدنيا كانت ماشية كويس.. الإعلام خلاكم تتصوروا إن البلد اتخربت
ــ وجرايم الاتحادية، والإقصاء، والاستحواذ، وسحل الناس فى الشارع، والسب والتحريض الطائفى من القيادات والمتضامنين مع التيار ضد المختلفين عقائديا: شيعة، بهائيين، أقباط.
ــ اجتهادات شخصية.. هم مش ملايكة.. مش كلهم تبنوا نفس الفكر.. محمد صالح آراؤه كان فيها دعوة للإخاء والمودة.. لأ بلاش المودة.. قصدى للقسط.
ــ مين محمد صالح؟
ــ معرفش.. أكيد كان فيه واحد آراؤه مختلفة واحتمال اسمه محمد صالح. تقدر تثبت إن مفيش حد اسمه محمد صالح كان بيقول كده؟
ــ لأ.
ــ شفت؟! عموما اختيارك للحظة تاريخية بعينها لإثبات فشل المشروع، اختيار غير علمى. بص للتيار على امتداد التاريخ
ــ يا راجل عيب. أفكرك بالتاريخ؟!
ــ مش التاريخ المزيف.. اللى كتبه الغرب الكافر وشوهته المؤامرة الصهيونية.
ــ بلاش التاريخ؟ شوف الجغرافيا. اختار بلد عملتوا فيها حاجة تدعم نظرياتك.
ــ تركيا.
ــ بذمتك؟! انت ناسى لما أوردغان جه مصر وقال تركيا علمانية وكنتوا هتاكلوه؟!
ــ اركن الكلام ده على جنب واتخيل الدنيا لما يسود الخير.
ــ مادام خيال، اروح اتخيل مع أى حد. اشمعنى انت؟
ــ لإن الحل عندى مبنى على مبدأ لا يخطئ
ــ وهو إيه؟
ــ سنتوكل على الله.
ــ نعم؟!
ــ من يتوكل على الله فهو حسبه. واللا انت معترض؟
ــ ونعم بالله لكن..
ــ أومال مش عايز تسمع كلامه ليه؟
ــ يا عم استغفر الله.. أنا عايز أفهم.
ــ الإيمان تسليم مش فهم. أومال بنمسح ظهر الخف بدل بطنه ليه؟ المسألة مش عقل. لو آمنت وسلمت، المسائل هتبقى تمام إن شاء الله. النظرية سليمة. المشكلة فى التطبيق البشرى.
ــ وتطبيق حضرتك ربانى؟
ــ ربانى أصلى..
ــ يا عم ما انت اديتنى كتب لقيتها كلام بشرى مكتوب بعد الوحى بقرون وفى زمن غير زماننا
ــ النظرية مش ممكن تفشل.
ــ بأمارة إيه.
ــ اقرا أول سطر فيها..
ــ بيقول إيه.
ــ «نظريتنا أحلى نظرية»..
ــ نعم؟!
ــ الأهم فى الحقيقة هو تانى سطر..
ــ اللى هو؟
ــ «نظريتنا مش ممكن تفشل».
ــ هى دى النظرية؟
ــ مش كلها.
ــ طب لها تفسير؟
ــ تفسيرها فى تالت سطر.
ــ وده بيقول إيه؟
ــ «لو اتهيألك أن النظرية فشلت تبقى الغلطة مش فى النظرية الغلطة فيك يا فاشل».
ــ هممم.. السطر الرابع فيه إيه؟
ــ خلاص كده..
ــ أنت متأكد إن دى نظرية؟
ــ طبعا.. ودى عايزه كلام. المشروع كله متأصل ومفيش كلمة ما رجعناش فيها للأصول. سلم انت أمرك لله؟
ــ ..
ــ متردد فى إيه؟ كفرت بربنا والا معترض؟ قول ما تخافش.. انت كفرت مش كده؟ عادى يعنى.. يا راجل قول.