في أول رد فعل للفنانة حلا شيحة بعد إعلان أشرف زكي نقيب الممثلين قراره بشطب عضويتها، بعد هجومها الأخير على الفن والفنانين، في إطار أزمتها مع الفنان تامر حسني، بسبب فيلم "مش أنا".
ونشرت حلا، صورتها مرتدية الحجاب بصحبة ابنتها، على حسابها الرسمي على موقع انستجرام، وعلقت: "حابة أشكر كل الناس الجميلة علي رسايلهم الجميلة المشجعة، وحابة أشكر كل الصحافة اللي نشرت فتوى دار الإفتاء النهاردة اللي موقفي هو نفس موقفها اللي بيوضح إن التمثيل والفن عموما زي أي مهنة في الدنيا حلاله حلال وحرامه حرام".
وأضافت: "وأنا لا أحب أن أكون جزءً من أي نوع من التطرف سواء باسم الدين أو باسم الفن.. ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي".
وتابعت: "حبي للفن محدش يقدر ينكره ولا يزايد عليه.. أنا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع أصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ".
وتابعت: "بالنسبة للكلام غير اللائق عن الأجر.. كل اللي في المجال شاهدين إني كنت اعتذر عن عدد كبير من الأعمال الفنية وكنت بقبل أجور أقل مما يتناسب معي تعاونا مع صناع العمل.. وأصلا ما استلمتش الجزء الأخير من أجري في الفيلم لما أتأخر نزوله جدا وبدأت اتغير وأصلّح.. لأن بصراحة الكلام عن (أجر كبير) ضحكني".
وقالت: "أنا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب لكن الجديد اني مش هاعمل كده على حساب اللي انا مؤمنه بيه بجد جوايا زي ما قولت مؤخرا.".
وتابعن: "أنا لا أهاجم أحدا ولا أحارب أحدا ولا أنا أفضل من أحد ولا أنصح أحدا قبل ما أنصح نفسي أولاً وكلنا نخطئ مفيش حد معصوم من الخطأ".
واختتمت حديثها: "بتمني الخير دايماً لكل الناس بما فيهم كل زمايلي وصناع العمل".